ឯកឧត្ដមតាំង ម៉េងលាន អញ្ជើញដឹកនាំកិច្ចប្រជុំផ្សព្វផ្សាយលទ្ធផលសន្និបាតគណៈកម្មាធិការកណ្តាល លើកទី៤៥ អាណត្តិទី៥ និងបូកសរុបលទ្ធផលការងារប្រចាំខែរបស់គណៈកម្មាធិការគណបក្សសង្កាត់តាខ្មៅ ក្រុងតាខ្មៅ ខេត្តកណ្តាល

កណ្តាល៖ នាព្រឹកថ្ងៃសុក្រ ៩រោច ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២១ ខែកុម្ភៈ ឆ្នាំ២០២៥ ឯកឧត្ដមតាំង ម៉េងលាន សមាជិកគណៈកម្មាធិការកណ្ដាល និងជាប្រធានក្រុមការងារគណបក្សចុះមូលដ្ឋានសង្កាត់តាខ្មៅ បានអញ្ជើញជាអធិបតីក្នុងកិច្ចប្រជុំផ្សព្វផ្សាយខ្លឹមសារលទ្ធផលសន្និបាតគណៈកម្មាធិការកណ្តាល លើកទី៤៥ អាណត្តិទី៥ របស់គណបក្សប្រជាជនកម្ពុជា និងបូកសរុបលទ្ធផលការងារប្រចាំខែមករា និងលើកទិសដៅបន្តសម្រាប់ខែកុម្ភៈ ឆ្នាំ២០២៥ របស់ក្រុមការងារគណបក្សចុះមូលដ្ឋានសង្កាត់តាខ្មៅ ។

ក្នុងកិច្ចប្រជុំនេះ មានការអញ្ជើញចូលរួមពីឯកឧត្តម លោកជំទាវ ប្រធានក្រុមការងារគណបក្សចុះមូលដ្ឋានសង្កាត់តាខ្មៅ ឯកឧត្តម លោកជំទាវ លោក លោកស្រី ជាអនុប្រធាន និងសមាជិក សមាជិកា ថ្នាក់កណ្តាល ថ្នាក់ខេត្ត ថ្នាក់ស្រុក ចុះមូលដ្ឋានសង្កាត់តាខ្មៅ សមាជិក សមាជិកានៃគណៈកម្មាធិការគណបក្សសង្កាត់តាខ្មៅ ព្រមទាំងសមាជិក សមាជិកានៃគណៈកម្មាធិការគណបក្សសង្កាត់ សរុបចំនួន ៣៦៧ នាក់។

កិច្ចប្រជុំ បានប្រព្រឹត្តទៅក្នុងគោលបំណងផ្សព្វផ្សាយសេចក្តីជូនដំណឹង ស្តីពីលទ្ធផលនៃសន្និបាតគណៈកម្មាធិការកណ្តាល លើកទី៤៥ អាណត្តិទី៥ របស់គណបក្សប្រជាជនកម្ពុជា និងស្តាប់របាយការណ៍ស្តីពីលទ្ធផលការងារប្រចាំខែមករា និងលើកទិសដៅបន្តសម្រាប់ខែកុម្ភៈ ឆ្នាំ២០២៥ របស់ក្រុមការងារគណបក្សចុះមូលដ្ឋានសង្កាត់តាខ្មៅ និងគណៈកម្មាធិការគណបក្សសង្កាត់តាខ្មៅ។

បន្ទាប់ពីបានស្តាប់នូវរបាយការណ៍វឌ្ឍនភាពការងារមួយចំនួនរបស់គណបក្ស និងការចូលរួមជាមតិយោបល់របស់អង្គប្រជុំរួចមក ឯកឧត្តមបណ្ឌិត បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមការងារ ដែលបានបំពេញតួនាទីភារកិច្ចរបស់ខ្លួន ប្រកបដោយការយកចិត្តទុកដាក់ និងការទទួលខុសត្រូវខ្ពស់។ ស្របតាមលទ្ធផលសន្និបាតគណៈកម្មាធិការកណ្តាល និងអនុសាសន៍របស់សម្ដេចតេជោ ប្រធានគណបក្សប្រជាជនកម្ពុជា ឯកឧត្តមបណ្ឌិត បានជំរុញដល់គ្រប់អង្គការចាត់តាំង និងរចនាសម្ព័ន្ធបក្សគ្រប់ថ្នាក់របស់គណបក្សស្រុក ត្រូវថែរក្សាសាមគ្គីភាព ឯកភាពផ្ទៃក្នុងរចនាសម្ព័ន្ធគណបក្សរបស់ខ្លួនឱ្យកាន់តែមានភាពធន់ និងរឹងមាំ ដើម្បីពង្រឹង និងពង្រីកភាពឈ្នះរបស់គណបក្សប្រជាជនកម្ពុជា ដើម្បីធានានូវនិរន្តរភាពជាតិ សន្តិភាព និងការអភិវឌ្ឍយូរអង្វែង៕