ភូមិចំនួន០៤ភូមិ ក្នុងសង្កាត់ព្រែកស្តី ក្រុងសំពៅពូន ត្រូបានអាជ្ញាធរខេត្តកណ្តាលធ្វើការបិទផ្សាយជូនប្រជាពលរដ្ឋមកពិនិត្យ ផ្ទៀងផ្ទាត់ទិន្នន័យក្បាលដី

កណ្តាល៖ភូមិចំនួន០៤ គឺភូមិព្រែកប៉ុក ភូមិអន្លង់សាន ភូមិកោះចាស់ និងភូមិព្រែកស្តី សង្កាត់ព្រែកស្តី ក្រុងសំពៅពូន ស្មើនឹង២,៥៤៥ក្បាលដី ត្រូវបានបិទផ្សាយជាសាធារណៈនូវឯកសារនៃការវិនិច្ឆ័យ ជូនបងប្អូនប្រជាពលរដ្ឋនាព្រឹកថ្ងៃទី២៨ ខែកុម្ភៈ ឆ្នាំ២០២៥ ដើម្បីអោយបងប្អូនប្រជាពលរដ្ឋមកពិនិត្យ ផ្ទៀងផ្ទាត់រកពីភាពត្រឹមត្រូវពិតប្រាកដ បើសិនជាខុឈ្មោះ ថ្ងៃ ខែ ឆ្នាំ កំណើត ប្រភេទទ្រព្យ ទំហំដី ត្រូវរាយការណ៍មកមន្ត្រីដែលនៅប្រចាំការក្នុងរយៈពេល ១៥ថ្ងៃបងប្អូនប្រជាពលរដ្ឋអាចធ្វើការផ្ទៀងផ្ទាត់ ស្នើសុំកែតម្រូវ ឬតវ៉ាចំពោះចំណុចណាមួយដែលមិនត្រឹមត្រូវ និងឆាប់បានចេញប័ណ្ណកម្មសិទ្ធជូន។

ឯកឧត្តម ហាក់ សុខមករា អភិបាលរងខេត្តកណ្តាល បានមានប្រសាសន៍ថា៖ ប្រជាពលរដ្ឋដែលទទួលបានប័ណ្ណកម្មសិទ្ធិស្របច្បាប់ គឺជាម្ចាស់ដីធ្លីពេញលក្ខណៈ ហើយត្រូវបានការពារដោយច្បាប់ ហើយបងប្អូនដែលជាម្ចាស់ដីមានសិទ្ធិប្រើប្រាស់អាស្រ័យផល និងចាត់ចែងដីរបស់ខ្លួនផ្តាច់មុខ និងទូលំទូលាយ កុំឱ្យតែយកដីនោះទៅប្រើប្រាស់ក្នុងបទណាមួយដែលច្បាប់បានហាមឃាត់តែប៉ុណ្ណោះ ។

ឯកឧត្តមបានបន្ថែមថា៖ការបិទផ្សាយជាសាធារណៈនូវឯកសារនៃការវិនិច្ឆ័យ ចំនួន០៤ភូមិ ក្នុងសង្កាត់ព្រែកស្តី ក្រុងសំពៅពូន ដែលមានចំនួន ២,៥៤៥ក្បាលដី នាពេលនេះ ជាការបិទផ្សាយលើកទី១៦ សម្រាប់ក្រុងសំពៅពូន និងជាលើកទី២៦៨ សម្រាប់ខេត្តកណ្តាលរបស់យើងទាំងមូល ។

ឯកឧត្តមបានបន្តថា៖ក្រោមម្លប់សុខសន្តិភាព ស្ថិរភាពនយោបាយ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាមេដឹកនាំវ័យក្មេងប្រកបដោយថាមពលមាន ទេពកោសល្យ និងបន្តនាំមកឲ្យប្រទេសជាតិនូវការអភិវឌ្ឍរីកចំរើនឥតឈប់ឈរ មានស្ថិរភាព មានសន្តិភាព ពិត ប្រាកដ និងធ្វើឲ្យប្រជាពលរដ្ឋមានភាពសុខសាន្ត មានជីវភាពរស់នៅសមរម្យ តាមរយៈការកសាងហេដ្ឋារចនា សម្ព័ន្ធ ផ្លូវ ស្ពាន សាលារៀន វត្តអារាម មន្ទីរពេទ្យ មណ្ឌលសុខភាព ប៉ុស្តិ៍សុខភាព ជាដើម។ល។ក្នុងន័យនេះយើងទាំងអស់គ្នាត្រូវប្តេជ្ញាធ្វើយ៉ាងណា ថែរក្សាសន្តិភាព ដែលរកមកបានដោយលំបាកនេះឲ្យ នៅស្ថិតស្ថេរគង់វង្ស ជូនប្រជាពលរដ្ឋ ទុកជូនកូនចៅរបស់យើងឲ្យបានយូរអង្វែងច្រើនជំនាន់ ដើម្បីបន្តពង្រីកឱកាសអភិវឌ្ឍឲ្យកាន់តែប្រសើរឡើងជាលំដាប់នូវជីវភាពរស់នៅរបស់យើងទាំងអស់គ្នា។

តាមរបាយការណ៍របស់លោក សុក កាន់ណារិទ្ធ ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្ត បានអោយដឹងថា៖ ក្រុងសំពៅពូនបានបិទផ្សាយរួចមកដល់ពេលនេះចំនួន ១៦លើក ហើយការបិទផ្សាយនាពេលនេះមានចំនួន ០៤ ភូមិ គឺភូមិព្រែកប៉ុក ភូមិអន្លង់សាន្ត ភូមិកោះចាស់ និងភូមិព្រែកស្តី សង្កាត់ព្រែកស្តី មានចំនួន ២,៥៤៥ក្បាលដី ក្នុង នោះបានចែកបណ្ណរួចចំនួន១៥លើក សរុបបានចំនួន ១៣, ២៦៤បណ្ណ។

លោកប្រធានមន្ទីរក៏បានអំពាវនាវដល់បងប្អូនប្រជាពលរដ្ឋទាំងអស់ ដែលមានដីនៅក្នុងតំបន់ដែលបានធ្វើការបិទផ្សាយនាពេលនេះ សូមមេត្តាមកចូលរួមពិនិត្យទិន្នន័យឱ្យបានគ្រប់គ្នា ដែលមានរយៈពេល ១៥ថ្ងៃ គិតចាប់ពី ថ្ងៃទី២៨ ខែកុម្ភៈ រហូតដល់ថ្ងៃទី១៤ ខែមីនា ឆ្នាំ២០២៥ ដោយមិនគិតថ្ងៃបុណ្យ ឬថ្ងៃឈប់សម្រាកឡើយ៕