ពិធីបញ្ចុះខណ្ឌសីមា និងសម្ពោធសមិទ្ធផលនានា ក្នុងវត្តសំរោងធំ ហៅវត្តសំរោងក្អែរ” នៅស្រុកកៀនស្វាយ

កណ្តាល៖ ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាលនៅរសៀលថ្ងៃទី១ ខែមិនា ឆ្នាំ២០២៥នេះ បានអញ្ជើញជាអធិបតីក្នុងពិធីបញ្ចុះខណ្ឌសីមា និងសម្ពោធសមិទ្ធផលនានា ក្នុងវត្តសំរោងធំ ហៅវត្តសំរោងក្អែរ” ស្ថិតនៅឃុំសំរោងធំ ស្រុកកៀនស្វាយ ដោយមានការចូលរួមពីអភិបាលក្រុង-ស្រុកទាំង១៣ សិស្សានុសិស្ស និងពុទ្ធបរិស័ទជាច្រើនរូប។

វត្តសំរោងធំ ហៅវត្តសំរោងក្អែរ បានកកើតឡើងក្នុងឆ្នាំ១៨០១ កាលនោះក្នុងវត្តមានដើមសំរោងមួយដើមដ៏ធំ ហើយមានមនុស្សជាច្រើន នាំគ្នាបោះផ្លែហូបក្អួតក្អែរចេញមកវិញ ទើបប្រជាពុទ្ធបរិស័ទក៏នាំគ្នាហៅវត្តសំរោងក្អែរ។ ចាប់ពីការកកើតវត្តមកដល់សម័យ ប៉ុលពត មានព្រះចៅអធិការវត្តចំនួន ៧ជំនាន់ ហើយនាសម័យនេះ វត្តសំរោងក្មែរត្រូវបានបំផ្លិចបំផ្លាញ ស្ទើរគ្មានសល់ ទើបតែនៅក្រោយថ្ងៃរំដោះ ៧មករា ឆ្នាំ១៩៧៩ វត្តត្រូវបានចាប់ផ្តើមសាងសង់ឡើងវិញដោយ ព្រះភិក្ខុសន្តិធម្មោ យឿង យ៉ាត់ លោកគ្រូ កឹម មួង លោកគ្រូ កែវ វ៉ន និងភិក្ខុ ចាប ប៊ុណ្ណារ៉ុង លុះដល់ឆ្នាំ ១៩៩៤ ព្រះគ្រូ យ៉ាន់ វ៉ាន់ធឿន បានបន្តតួនាទីជាព្រះចៅអធិការវត្ត និងចាប់ផ្តើមបន្តកសាងវត្ត រួមជាមួយ អាចារ្យ គណៈកម្មការ និងពុទ្ធបរិស័ទ។