ឯកឧត្តម ហាក់ សុខមករា អភិបាលរងខេត្តចុះជួបសុំណេះសំណាលជាមួយប្រជាពលរដ្ឋ និងបិទផ្សាយ ទិន្នន័យជាសាធារណៈនូវឯកសារ ការវិនិច្ឆ័យដីធ្លីមានលក្ខណៈជាប្រព័ន្ធចំនួនភូមិចំនួន៤ ក្នុងសង្កាត់ជ្រោយតាកែវ

(កណ្តាល)  នៅថ្ងៃព្រហស្បតិ៍១៤រោច ខែផល្គុន ឆ្នាំរោង ឆសក័ ពុទ្ធសក័រាជ ២៥៦៨ ត្រូវនិងថ្ងទី២៧ ខែមីនា ឆ្នាំ២០២៥ រដ្ឋបាលក្រុងសំពៅពូន បានរៀបចំពិធីសំណេះសំណាលជាមួយប្រជាពលរដ្ឋចំនួន៤ភូមិ ក្នុងសង្កាត់ជ្រោយតាកែវ ក្រុងសំពៅពូន ខេត្តកណ្តាល ក្រោមអធិបតីភាព ឯកឧត្តម ហាក់ សុខមករា អភិបាលរងខេត្ត តំណាងឲ្យ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល។ ក្នុងអង្កពិធីនេះដោយមានការអញ្ចើញចូលរួមពី ឯកឧត្តម លោកជំទាវ លោកប្រធានមន្ទីររៀបចំដែនដីនគរូបនីយកម្ម សំណង និងសុរិយោដីខេត្ត លោកអភិបាលក្រុង កងកម្លាំងប្រដាប់អាវុធទាំង៣ លោកចៅសង្កាត់ លោកមេភូមិ លោក លោកស្រីមន្រ្តីរាជការជំវិញសាលាក្រុងសំពៅពូន និងប្រជាពលរដ្ឋជាច្រើនផងដែរ។

សូមជម្រាបថាៈ នៅក្នុងអង្កពិធីសំណេះសំណាល ឯកឧត្តម ហាក់ សុខមករា អភិបាលរងខេត្តកណ្តាល បានមានប្រសាសន៍ឲ្យដឹងថាៈការបិទផ្សាយជាសារធារណៈនូវឯកសារ នៃការវិនិច្ឆ័យដីធ្លី ដែលមានលក្ខណៈជាប្រព័ន្ធនេះ ដើម្បីទុកពេលឲ្យប្រជាពលរដ្ឋជាម្ចាស់ក្បាលដី មកពិនិត្យផ្ទៀងផ្ទាត់ពីទំហំដី ឬឈ្មោះ អក្ខរាវិរុទ្ធ និងឯកសារឲ្យបានត្រឹមត្រូវ ហើយក្នុងរយៈពេល១៥ថ្ងៃ ដោយគិតចាប់ពីថ្ងៃបិទផ្សាយនេះ ដើម្បីសម្រាបឲ្យម្ចាស់ក្បាលដីធ្វើការតវ៉ាកែតម្រូវផងដែរ។ទិន្នន័យក្បាលដីរបស់ប្រជាពលរដ្ឋ ដែលបានបិទផ្សាយជាសាធារណៈនេះនៅក្នុងភូមិចំនួន០៤ គឺភូមិព្រែកត្រឡាច ភូមិជ្រោយតាកែវ ភូមិកំពង់ដរ និងភូមិព្រែកតាឃិន ក្នុងសង្កាត់ជ្រោយតាកែវ ក្រុងសំពៅពូន ខេត្តកណ្តាល ដែលមានក្បាលដីសរុប៣១៨៤ក្បាលដី។

ឯកឧត្តម ហាក់ សុខមករា បន្យថាៈ ប័ណ្ណកម្មសិទ្ធិ គឺមានផលប្រយោជន៍ជាច្រើន ធានានូវសិទ្ធិរបស់យើងក្នុងការធ្វើជាម្ចាស់ ឬការកាន់កាប់ដីធ្លី សូមប្រជាពលរដ្ឋត្រូវប្រញាប់រួសរាន់ទៅពិនិត្យមើលការបិទឯកសារនៃការវិនិច្ឆ័យដីធ្លី ដែលមានរយៈពេល១៥ថ្ងៃ គិតចាប់ពីថ្ងៃទី២៧ ខែមីនា រហូតដល់ថ្ងៃទី១០ ខែមេសា ឆ្នាំ២០២៥ គឺរាប់បញ្ជូលទាំងថ្ងៃឈប់សម្រាក។ ជាលទ្ធភាពឲ្យម្ចាស់ក្បាលដី និងអ្នកពាក់ព័ន្ធធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាល់ដីរបស់ខ្លួន ព្រមទាំងធ្វើការតវ៉ាក្នុងករណីមានការខុសឆ្គង បើក្នុងករណីផុតរយៈពេលកំណត់នៅការបិទផ្សាយ ប្រជាពលរដ្ឋមិនអាចជំទាស់តវ៉ាបានឡើយ។

ឯកឧត្តមអភិបាលរងខេត្ត ក៏បានធ្វើការអំពាវនាវ ដល់អាជ្ញាធរមូលដ្ឋាន រួមទាំងប្រជាពលរដ្ឋ ដែលបានចូលរួមនាពេលនេះ ពេលត្រឡប់ទៅវិញ ត្រូវបន្តផ្សព្វផ្សាយពីការបិទផ្សាយជាសាធារណៈនូវឯកសារនៃការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធឲ្យបានដឹង ហើយទិន្នន័យ ដែលក្រុមការងារចុះបញ្ជីរដីធ្លីមានលក្ខណៈជាប្រព័ន្ធរបស់មន្ទីរ បានអនុវត្តតាមនីតិវិធីឲ្យបានគ្រប់ៗគ្នា។ លទ្ធផលសម្រេចបាននាពេលនេះគឺដោយមានការចូលរួមសហការពីបងប្អូនប្រជាពលរដ្ឋ ទើបក្រុមការងារសុរិយោដីខេត្ត អាជ្ញាធរគ្រប់លំដាប់ថ្នាក់ទាំងអស់ បានខិតខំប្រឹងប្រែងការងារចុះបញ្ជីនេះបានយ៉ាងរលូន។

លោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្តាល បានឱ្យដឹងថាៈ នៅក្រុងសំពៅពូន បានបិទផ្សាយមកដល់ពេលនេះចំនួន១៧លើក ហើយបន្តបិទផ្សាយនាពេលនេះមានចំនួន០៤ភូមិដែលមានចំនួនភូមិ និងចំនួនក្បាលដីមានខាងលើនេះ ក្នុងនោះបានចែកប័ណ្ណរួចចំនួន១៥លើកសរុបបានចំនួន១៣,២៧៩ប័ណ្ណ៕