គោយន្ត២គ្រឿងដឹកឈើមូលឆ្លងកាត់ទឹកដីស្រុកជីក្រែងប៉ុន្តែលោក សូរ ផល្លា អសមត្ថភាពក្នុងការបង្រាប ជាពិសេសទឹកមាត់សាបដូចទឹកទន្លេបញ្ជាកូនចៅគ្មានអ្នកស្តាប់បញ្ជា

ស្រុកជីក្រែង៖ គោយន្តកន្ត្រៃដឹកឈើដុំចំនួន២គ្រឿងដឹកឈើចេញពីឃុំពពក ស្រុកស្ទោង ខេត្តកំពង់ធំ ឆ្ពោះទៅកាន់ទឹកដីស្រុកជីក្រែងខេត្តសៀមរាបបានដោយរលូនខណ:ពេលដែលលោក សូរ ផល្លា ទឹកមាត់សាបដូចទឹកទន្លេព្រោះបញ្ជាកូនចៅអោយទៅបែជាកូនចៅពន្យាពេលជាង២ម៉ោងធ្វើអោយក្រុមដឹកបទល្មើសព្រៃឈើដឹកដល់ទីតាំងបានដោយសុវត្ថិភាព។

ជាក់ស្តែងនៅយប់ថ្ងៃទី២៧ ខែមិនា ឆ្នាំ២០២៥ វេលាម៉ោង៩និង៤៧នាទីយប់ ក្រុមការងារអ្នកសារព័ត៌មានអាណាចក្រខ្មែរបានប្រទះឃើញគោយន្តកន្ត្រៃ២គ្រឿងដឹកឈើដុំចេញពីឃុំពពក ស្រុកស្ទោង ខេត្តកំពង់ធំ ឆ្ពោះទៅកាន់ស្រុកជីក្រែង ខេត្តសៀមរាប ខណៈនោះក្រុមការងារអ្នកសារព័ត៌មានអាណាចក្រខ្មែរក៏បានទូរស័ព្ទរាយការណ៍ជូនលោក សូរ ផល្លា ដែលមានតួនាទីជានាយផ្នែករដ្ឋាបាលព្រៃឈើកំពង់ក្តីដើម្បីជួយទប់ស្កាត់និងបង្ក្រាបក្រុមដឹកបទល្មើសព្រៃឈើទាំងនោះ។

ខណៈពេលដែលរាយការណ៍ជូនលោក សូរ ផល្លា មន្ត្រីរូបនោះក៏ឆ្លើយថាមិនអីទេចាំអោយក្រុមការងារចុះទៅហើយក៏បានប្រាប់អោយអ្នកសារព័ត៌មានយើងតាមបន្តទៀតគឺតាមអោយជាប់ ប៉ុន្តែគ្រប់យ៉ាងបានត្រឹមតែតាមនិងរាយការណ៍តែគ្មានមន្ត្រីណាមួយមកបង្ក្រាបឡើយ(អ្នកតាមចេះតែតាម អ្នករកឡេះចេះតែរកឡេះនេះនោះមិនចេះចប់) សរុបជារួមតាម២ម៉ោងនៅតែគ្មានមន្ត្រីមកបង្ក្របសោះដែលជាហេតុធ្វើអោយក្រុមជនល្មើសទាំងនោះដឹកឈើដល់ទីតាំងបានដោយសុវត្ថិភាព។

គួររំលឹកផងដែរថាដោយសារតែមានមន្ត្រីបែបនេះហើយទើបធ្វើអោយព្រៃឈើរលាយអស់គ្មានសល់ ហើយកន្លងមកក៏មានមហាជនជាច្រើនតែងតែដាក់ការសង្ស័យថាប្រហែលជាមន្ត្រីទាំងនោះត្រូវរ៉ូវគ្នាជាមួយក្រុមឈ្មួញទាំងនោះហើយមើលទៅបានជាមិនបង្ក្រាប ចំណុចទាំងអស់នេះហើយបើសិនជាមហាជនក៏ដូចជាអ្នកសារព័ត៌មានចុះផ្សាយរិះគន់កុំខឹងគេព្រោះអស់លោក អសមត្ថភាពមែន ប្រសិនបើអស់លោកមានសមត្ថភាពក្នុងការបង្រ្កាបមែននោះគឺមិនបណ្តោយអោយក្រុមបទល្មើសដឹកជញ្ជូនឈើបានដោយរលូនបែបនេះទេ។

ជុំវិញករណីខាងលើនេះក៏សូមសំណូមពរដល់លោកប្រធានមន្ទីកសិកម្មខេត្តសៀមរាបសូមមេត្តាមានវិធានការរឹតបន្តឹងដល់មន្ត្រីក្រោមឱវាទរបស់លោកផង សូមអោយមានសកម្មភាពទប់ស្កាត់និងបង្ក្រាបបទល្មើសព្រៃឈើ។