ក្រុមការងារនៃមូលនិធិគន្ធបុប្ផាកម្ពុជាជួបសំណេះសំណាលជាមួយក្រុមគ្រូពេទ្យមន្ទីរពេទ្យគន្ធបុប្ផាសៀមរាប។

ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជានាយកប្រតិបត្តិនៃមូលនិធិគន្ធបុប្ផាកម្ពុជាបានដឹកនាំក្រុមការងារជួបសំណេះសំណាល និងសួរសុខទុក្ខថ្នាក់ដឹកនាំ បុគ្គលិក ក្រុមគ្រូពេទ្យ ព្រមទាំងពិនិត្យស្ថានភាពទូទៅនៃការពិនិត្យ និងព្យាបាលទារក និងកុមារ នៅមន្ទីរពេទ្យជ័យវរ្ម័នទី៧ (មន្ទីរពេទ្យគន្ធបុប្ផាសៀមរាប) នៅថ្ងៃចន្ទ ១០កើត ខែជេស្ឋ ព.ស. ២៥៦៧ ត្រូវនឹងថ្ងៃទី២៩ ខែឧសភា ឆ្នាំ២០២៣ នេះ។

ក្នុងឱកាសនោះ ឯកឧត្តមរដ្ឋលេខាធិការ បានមានប្រសាសន៍ថា មន្ទីរពេទ្យគន្ធបុប្ផាគឺជាមន្ទីរពេទ្យដែលមានភាពល្បីល្បាញចំពោះការព្យាបាលកុមារដោយឥតគិតថ្លៃ ប្រកបដោយគុណភាព និងមិនមានការរើសអើង។

ទាំងនេះជាលទ្ធផលនៃការពួតដៃគ្នារបស់ថ្នាក់ដឹកនាំ បុគ្គលិក ក្រុមគ្រូពេទ្យទាំងអស់ក្នុងការការពារជីវិតកុមារនៅកម្ពុជា ពីការឆក់យករបស់បច្ចុរាជ ជាមួយនឹងការលះបង់យ៉ាងធំធេងទាំងកម្លាំងកាយ និងកម្លាំងចិត្ត បញ្ញា ស្មារតី យ៉ាងមោះមុត ទាំងយប់ ទាំងថ្ងៃ មិនដែលត្អូញត្អែរឡើយ។

ក្នុងឱកាសនោះ ឯកឧត្តមរដ្ឋលេខាធិការ បានពាំនាំការផ្តាំផ្ញើសួរសុខទុក្ខ ការថ្លែងអំណរគុណ និងកោតសរសើរដ៏ជ្រាលជ្រៅ របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃមូលនិធិគន្ធកម្ពុជា ជូនថ្នាក់ដឹកនាំ ក្រុមគ្រូពេទ្យ និងបុគ្គលិកនៃមន្ទីរពេទ្យគន្ធបុប្ផាសៀមរាប ក៏ដូចជាមន្ទីរពេទ្យកុមារគន្ធបុប្ផាភ្នំពេញទាំងអស់ដែលតែងតែបានជួយសង្រ្គោះជីវិតទារក និងកុមារប្រកបដោយក្តីអាណិត ស្រឡាញ់ ភាពកក់ក្តៅ និងផ្ដល់ក្តីសង្ឃឹមដល់កុមារ ក៏ដូចជាក្រុមគ្រួសារ ប្រកបដោយភាពញញឹម និងចេញពីបេះដូង។ ឯកឧត្តមក៏បានរំលឹកនូវគុណនូបការៈដ៏ធំធេងរបស់លោក Beat Richner ដែលបានលះបង់កម្លាំងកាយចិត្តពេញមួយជីវិតដើម្បីកុមារនៅកម្ពុជា ទោះបីជាលោកបានទទួលមរណភាពទៅហើយក្តី ក៏ប្រជាពលរដ្ឋទាំងអស់ នៅតែចងចាំក្នុងបេះដូងជានិច្ច។

ជាចុងក្រោយ ឯកឧត្តមរដ្ឋលេខាធិការ បានមានប្រសាសន៍ថា យើងនឹងរួមគ្នាបន្តធានានូវកិច្ចដំណើរការជានិរន្តរបស់មន្ទីរពេទ្យគន្ធបុប្ផា ឱ្យខាងតែបាន តាមរយៈការរឹតបន្តឹងចំណងសាមគ្គីភាពជាមួយ មូលនិធិគន្ធបុប្ផាស្វីស និងបង្កើតយុទ្ធនាការផ្សព្វផ្សាយ កៀរគរការបិរច្ចាគ ឱ្យបានកាន់តែទូលំទូលាយបន្ថែមទៀត ក្នុងស្មារតី “ខ្មែរជួយខ្មែរ” ដើម្បីផ្ដល់ភាពញញឹមជូនកុមារដែលជាអនាគតដ៏ភ្លឺស្វាងរបស់កម្ពុជា៕