ព្រមានមន្ត្រីអាវុធហត្ថរូបណា ដែលពាក់ព័ន្ធនឹងធ្វើជាខ្នងបង្អែកដល់ឧក្រិដ្ឋជនគ្រឿងញៀន និងបទល្មើសនានា

កំពង់ស្ពឺ៖ មេបញ្ជាការកងរាជអាវុធហត្ថខេត្តកំពង់ស្ពឺ លោកឧត្តមសេនីយ៍ត្រី ម៉េង ស្រ៊ុន បានព្រមានដល់មន្ត្រីអាវុធហត្ថក្នុងក្របខណ្ឌខេត្តកំពង់ស្ពឺ កុំមានការពាក់ព័ន្ធនឹងធ្វើជាខ្នងបង្អែកឧក្រិដ្ឋជនគ្រឿងញៀន និងបទល្មើសនានា។ ការព្រមានដូចនេះ ក្នុងឱកាសប្រកាសចូលកាន់តំណែង លោក ជាង រចនា ជាមេបញ្ជាការមូលដ្ឋានកងរាជអាវុធហត្ថស្រុកសាមគ្គីមុនីជ័យ នៅរសៀលថ្ងៃទី២៣ ខែមករា ឆ្នាំ២០២៥។

ម្យ៉ាងវិញទៀត មេក្រុង ស្រុក ដែលមិនទាន់បង្ក្រាបបទល្មើសបានត្រូវតែបង្ក្រាបឱ្យបាន។ ចំពោះអ្នកដែលបានធ្វើហើយ ត្រូវបន្តធ្វើបន្ថែមទៀត។ ក្នុងករណីមេបញ្ជាការដែលឡើងទៅកាន់ក្រុង ស្រុក ហើយ មិនធ្វើ ឬមិនបង្ក្រាបបទល្មើស នឹងត្រូវពិនិត្យឡើងវិញ។ ប្រសិនរកឃើញថា បទល្មើសកើតមានច្រើនក្នុងមូលដ្ឋានដែលខ្លួនគ្រប់គ្រង មិនអនុញ្ញាតឱ្យនៅបន្តទៀតទេ។ ទន្ទឹមនេះ ក៏ត្រូវគិតគូក្នុងការកសាងកន្លែងធ្វើការ ស្នាក់នៅរបស់មន្ត្រីឱ្យបានសមរម្យ ផ្តល់អាហារហូបចុកឱ្យបានគ្រប់គ្រាន់ ពិសេសគ្រប់គ្រងសព្វាវុធឱ្យគត់មត់៕