កាកបាទក្រហមកម្ពុជា រៀបចំព្រះរាជពិធីបុណ្យចម្រើនព្រះជន្មយុ គម្រប់ ៨៨ យាងចូល ៨៩ព្រះវស្សា ថ្វាយសម្តេចម៉ែ

រាជធានីភ្នំពេញ ព្រឹកចន្ទ ទី១៧ មិថុនា ២០២៤

លោកឧកញ៉ាតាំង សុខឃី អនុប្រធានកិត្តិយសសាខា និងលោកជំទាវ អញ្ជើញអមដំណើរ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងពិធីសូត្រមន្ត ចម្រើនព្រះបរិត្ត និងរាប់បាតព្រះសង្ឃ ៨៩អង្គ ដើម្បីថ្វាយព្រះពរជ័យសិរីមង្គល ក្នុងឱកាសព្រះរាជពិធីបុណ្យចម្រើនព្រះជន្មវឌ្ឍនមង្គលគម្រប់ ៨៨ យាងចូល ៨៩ ព្រះវស្សា សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

ទូលព្រះបង្គំយើងទាំងអស់គ្នា សូមលំឱនកាយ លើកហត្ថប្រណម្យក្រាបថ្វាយបង្គំសម្តែងនូវកតញ្ញកតវេទិតាធម៌ដ៏ជ្រាលជ្រៅថ្វាយ និងបួងសួងដល់អស់វត្ថុស័ក្តិសិទ្ធិ ទាំងឡាយក្នុងលោក ទេវតារក្សាព្រះមហាស្វេតច្ឆត្រ គុណបុណ្យព្រះរតនត្រ័យ កែវទាំងបី បុណ្យបារមីដួងព្រះវិញ្ញាណ ក្ខន្ធ នៃអតីតព្រះមហាក្សត្រ ព្រះមហាក្សត្រីយានី និងព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និង ឯកភាពជាតិខ្មែរ ព្រះបរមរតនកោដ្ឋ សូមជួយថែរក្សាអភិបាល និងប្រោះព្រំសព្ទសាធុការពរជ័យ បវរសួស្តី សិរីវឌ្ឍនា វិបុលសុខ មហាប្រសើរ ថ្វាយ សម្ដេចព្រះមហាក្សត្រី សូមព្រះអង្គទ្រង់ប្រកបដោយព្រះបញ្ញាញាណ ភ្លឺថ្លា ព្រះកាយពល មាំមួន ព្រះរាជសុខភាពល្អបរិបូណ៌ និងមានព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ ក្នុងបុព្វហេតុដើម្បី សង្គមធម៌ មនុស្សធម៌ និងជាព្រះវីរគំរូល្អឆ្នើម សម្រាប់ជាតិ និងប្រជានុរាស្ត្ររបស់ព្រះអង្គ៕