នេះគឺជាការបញ្ជាក់របស់ប្រមុខរដ្ឋាភិបាលសម្តេចហ៊ុន សែន នៅមហាសន្និបាតនៃក្តីសង្ឃឹមពិភពលោកលើកទី៧ ក្រោមប្រធានបទ«សន្តិភាពនៅតំបន់អាស៊ីប៉ាស៊ីហ្វិក»។ការលើកឡើងរបស់សម្តេចហ៊ុន សែន គឺដោយភ្ជាប់ទៅនឹងករណីប្រទេសអាហ្វហ្គានីស្ថាន ដែលនៅពេលថ្មីៗនេះ ត្រូវបានសហរដ្ឋអាមេរិកដកកងទ័ពរបស់ខ្លួនចេញបន្សល់ទុកនូវភាពមិនប្រាកដប្រជានៃវាសនាប្រទេសក្រោមកណ្តាប់ដៃរបស់ពួកតាលីបង់។តាមរយៈបទពិសោធរបស់ប្រទេសអាហ្វហ្គានីស្ថាន សម្តេចហ៊ុន សែន បានរំឭកឡើងវិញពីភាពក្រៀមក្រំ និងជូរចត់នៃរឿងរ៉ាវដែលបានកើតនៅប្រទេសកម្ពុជាកាលពីថ្ងៃទី១៧មេសា១៩៧៥ នៅពេលដែលពួកខ្មែរក្រហមឡើងកាន់អំណាចក្រោយការដួលរលំនៃរបប លន់ នល់ ដែលគាំទ្រដោយសហរដ្ឋអាមេរិក។បើតាមសម្តេចទិដ្ឋភាពភូមិសាស្ត្រនយោបាយនៅតំបន់អាស៊ីប៉ាស៊ីហ្វិក កំពុងប្រែប្រួលយ៉ាងឆាប់រហ័ស ព្រមជាមួយការប្រែប្រួលតុល្យភាពអំណាចសកល និងការប្រកួតប្រជែងភូមិសាស្ត្រនយោបាយ ដែលកាន់តែស្មុគស្មាញ ស្រួចស្រាល់ និងគ្រោះថ្នាក់បំផុត។សម្តេចហ៊ុន សែន អះអាងថា សន្តិភាពពេញលេញរបស់កម្ពុជាគឺទទួលបានមកពីការចូលរួមពីភាគីពាក់ព័ន្ធនៅក្នុងប្រទេស។ សម្តេចបានរំឭកថា កាលពីដើមទសវត្សឆ្នាំ៩០ទោះបីអន្តរជាតិបានចំណាយលុយប្រមាណ២ពាន់លានដុល្លារជួយដល់កម្ពុជាក៏ប្រទេសមួយនេះមិនអាចមានសន្តិភាពពេញលេញបានឡើយ។សង្គ្រាមនៅតែបន្តអូសបន្លាយរហូតដល់ខែ ធ្នូ ឆ្នាំ១៩៩៨ ទើបកម្ពុជាអាចឈានទៅសម្រចបានសន្តិភាពពេញលេញ បន្ទាប់ពីបានអនុវត្តនយោបាយ ឈ្នះ-ឈ្នះ ដើម្បីស្វែងរកដំណោះស្រាយរួមមួយ ក្នុងចំណោមជាសាសន៍របស់យើង។ សម្ដេចបានសម្ដែងនូវមោទនភាព ដែលវិទ្យាស្ថានចក្ខុវិស័យអាស៊ី(AVI) របស់កម្ពុជា ត្រូវបានសហព័ន្ធសន្តិភាពសកលជ្រើរើសបំពេញតួនាទីជាលេខាធិការដ្ឋានប្រចាំអាស៊ីប៉ាស៊ីហ្វិកនៃកម្មវិធី«ស្ថាប័នស្រាវជ្រាវឆ្នាំ២០២២»ដែលស្ថាប័នស្រាវជ្រាវក៏មានតួនាទីសំខាន់ក្នុងការចូលរួមចំណែកដោះស្រាយបញ្ហាវិបត្តិ និងលើកម្ពស់ការរក្សាសន្តិភាព តាមរយៈការវិភាគស៊ីជម្រៅ និងការបណ្ដុះស្មារតីផ្លាស់ប្ដូរមតិយោបល់ និងកិច្ចសន្ទនា។ក្រោមហេតុផលនេះហើយដែលសម្តេចបញ្ជាក់ថា «ភាពជាម្ចាស់ប្រទេស គឺជាគន្លឹះឈានទៅរកភាពជោគជ័យ និងសន្តិភាពពេញលេញ ប្រកបដោយនិរន្តរភាព»ដល់មនុស្សជាតិ៕
