ឯកឧត្តមជាវ តាយ អភិបាលខេត្តកំពតបញ្ជាក់ថា ដីរបស់រដ្ឋត្រូវតែរដ្ឋជាអ្នកកាន់កាប់គ្រប់គ្រង់ តែបើដីឯកជន រដ្ឋបាលខេត្តត្រូវចុះបញ្ជីជូនម្ចាស់ដី
ឯកឧត្តមបានបន្តថា ចំពោះករណីពហុកីឡដ្ឋានថ្មី ដែលស្ថិតក្នុងសង្កាត់បឹងទូក ក្រុងបូកគោដែលជាប់ពាក់ព័ន្ធនឹងកិច្ចសន្យាសាងសង់ និងដោះដូររវាង ក្រសួងអប់រំយុវជន និងកីឡា និងក្រុមហ៊ុន SRV Grup,Co.ltd រដ្ឋបាលខេត្តមិនមានសិទ្ធិក្នុងការសម្រេចអាកាត់នោះទេ មានតែក្រសួងអប់រំយុវជននិងកីឡា និងក្រសួសេដ្ឋកិច្ចនិងហិរញ្ញាវត្ថុ ប៉ុណ្ណោះទើបមានសិទ្ធិសម្រេចបញ្ចប់រឿងជាមួយក្រុមហ៊ុនបាន។ ហើយនៅពេលដែលមានការសម្រេចពីក្រសួងទាំងពីរ នឹងក្រុមហ៊ុនរួច ទើបរដ្ឋបាលខេត្តមានសិទ្ធក្នុងការចុះបញ្ជីចេញប័ណ្ណកម្មសិទ្ធជូនដល់ក្រុមហ៊ុន។ ប៉ុន្តែកិច្ចប្រជុំនាពេលនេះដើម្បីពិភាក្សាប្រមូលធាតុចូលពីជំនាញ និងអាជ្ញាធរពាក់ព័ន្ធឲ្យបានលម្អិត ដើម្បីជំរុញនីតិវិធីនឹងឈានទៅបញ្ចប់បញ្ហាដែលជាប់គាំងអស់ជាង១០ឆ្នាំមកនោះ។
គួររំលឹកថា តាមរបាយការណ៍បានឲ្យដឹងថា ក្នុងអំឡុងឆ្នាំ២០០៧ ក្រុមហ៊ុន SRV Grup,Co.ltd បានដាក់សំណើសុំប្ដូរទីតាំងដីទីលានបាល់បោះទំហំ ១៤២៦ម៉ែត្រការ៉េ និងដីទីលានបាល់ទាត់ទំហំ ៣២៥០០ម៉ែត្រការ៉េ នៅក្រុងកំពត ជាថ្នូរនឹងដីទីលានពហុកីឡដ្ឋានបាល់ទាត់ថ្មីបច្ចុប្បន្ននៅភូមិបឹងទូក ក្រុងបូកគោដែលមានទំហំ៥ម៉ឺនម៉ែត្រការ៉េ។ ក្នុងកិច្ចសន្យានោះក្រុមហ៊ុនត្រូវកសាងនូវហេដ្ឋារចនាសម្ព័ន្ធពាក់ព័ន្ធនឹងវិស័យកីឡាជាច្រើន។ ប៉ុន្តែដោយសារការអនុវត្តរបស់ក្រុមហ៊ុនមិនបានឆ្លើយតបតាមកិច្ចសន្យា ខិសលក្ខណៈស្តង់ដារ បទដ្ឋានបច្ចេកទេស នៃសំណង់សម្រាប់បម្រើវិស័យកីឡា និងអូសបន្លាយពេលវេលាផងនោះ ។
រាជរដ្ឋាភិបាលក៏បានឯកភាពជាគោលការណ៍ តាមសំណើរបស់ក្រសួងអប់រំយុវជននិងកីឡា គឺអនុញ្ញាតឲ្យប្ដូរតែទីតាំងដីបាល់បោះ ទំហំ១៤២៦ម៉ែត្រការ៉េប៉ុណ្ណោះ ហើយដីទីលានកីឡាបាល់ទាត់ទំហំ ៣២.៥០០ម៉ែត្រការ៉េ ត្រូវដកហូតយកមករក្សាជាទ្រព្យសម្បត្តិរដ្ឋវិញរហូតសព្វថ្ងៃនេះរហូតសព្វថ្ងៃនេះនៅតែរក្សាជាតារាងបាល់ទាត់ខេត្តកំពតដដែល។ ប៉ុន្តែបញ្ហាត្រង់ថា ពហុកីឡដ្ឋានថ្មីនៅក្រុងបូកគោ របស់ក្រុមហ៊ុន នៅមិនទន់បានចុះបញ្ជីថាជាកម្មសិទ្ធិរបស់ភាគីណានៅឡើយ ដោយសារដំណោះស្រាយក្នុងកិច្ចសន្យារវាងក្រសួងអប់រំ និងភាគីក្រុមហ៊ុនមិនទាន់មានការឯកភាពគ្នា៕
