យុវជនម្នាក់ បោកក្បាលស្លាប់ភ្លាមៗ បន្ទាប់ពីជិះម៉ូតូបុកជាមួយរថយន្ត ជ្រុលទៅបុកខឿនសំយ៉ាបផ្ទះប្រជាពលរដ្ឋ នៅភ្នំពេញ

ភ្នំពេញ៖ កាលពី យប់ថ្ងៃទី ២១ ខែតុលា ឆ្នាំ២០២២ ហេតុការណ៍នេះ ស្ថិតនៅតាមបណ្តោយផ្លូវបេតុង ២៨ គ្រួសារភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ ។

មុនពេលកើតហេតុមានរថយន្តមួយគ្រឿង ម៉ាកព្រូសពណ៌សរពាក់ស្លាកលេខ ភ្នំពេញ 2 BP 0517 បើកបរដោយបុរសម្នាក់ធ្វើដំណើរតាមបេតុងខាងលើទិសដៅពីកើតមកលិច ខណៈនោះគេក៏ឃើញមានយុវជនម្នាក់ទៀត បានបើកបរម៉ូតូមួយគ្រឿងម៉ាកឌ្រីមសង់ ពណ៌ខ្មៅស៊េរីឆ្នាំ២០១៦ ពាក់ស្លាកលេខ ភ្នំពេញ 1FX 0093 ធ្វើដំណើរស្របទិសគ្នាជាមួយរថយន្តក្នុងល្បឿនលឿន លុះមកដល់ត្រង់ចំណុចផ្លូវច្រកចូលមណ្ឌលសុខភាពភ្នំពេញថ្មីរថយន្តខាងលើបានស៊ីញ៉ូបត់ឆ្វេងចូលភ្លាមៗនោះ យុវជនដែលជិះម៉ូតូបានវ៉ាជែងរថយន្តក្នុងល្បឿនលឿនបណ្តាលអោយបុកកញ្ចក់ និងកាងរថយន្តខាងមុខក៏ជ្រុលទៅបុកខឿនសំយ៉ាបផ្ទះប្រជាពលរដ្ឋ បណ្តាលអោយផ្លោងចេញពីម៉ូតូបោកក្បាលស្លាប់ ។ យុវជនដែលបានស្លាប់នេះ មិនទាន់ស្គាល់អត្តសញ្ញាណនោះទេ។

សមត្ថកិច្ចជំនាញចរាចរណ៏ផ្លូវនៃស្នងការដ្ឋាននរគបាលរាជធានីភ្នំពេញ បានវាស់វែងរថយន្តនិងម៉ូតូ យកទៅរក្សារង់ចាំការដោះស្រាយគ្នានៅពេលក្រោយ និងធ្វើការស្រាវជ្រាវរកក្រុមគ្រួសារនៃសពដើម្បីមកទទួលយកទៅធ្វើបុណ្យតាមប្រពៃណី ៕