មេបញ្ជាការតំបន់ប្រតិបត្តិការសឹករងកណ្តាលចាត់តាំងតំណាងចុះសួរសុខទុក្ខសហការីក្រោយសម្រាលបុត្ររួច

កណ្តាល៖ នៅព្រឹកថ្ងៃទី០១ ខែសីហា ឆ្នាំ២០២៣ លោកវរសេនីយ៍ឯក ឈៀ វណ្ណឌី មេបញ្ជាការរង តំណាងដ៏ខ្ពង់ខ្ពស់ ឯកឧត្ដម ឧត្ដមសេនីយ៍ត្រី នៃ និយម មេបញ្ជាការ តំបន់ប្រតិបត្តិការសឹករងកណ្តាល បានដឹកនាំក្រុមការងារចុះសួរសុខទុក្ខ លោកស្រីអនុសេនីយ៍ឯក វ៉ាន់ សម្ផស្ស នាយរងផ្នែកគិលានដ្ឋាន ក្រោយពីបានសម្រាលបុត្ររួច កំពុងសម្រាកនៅគេហដ្ឋាន ភូមិកំពង់សំណាញ់ សង្កាត់តាខ្មៅ ក្រុងតាខ្មៅ ខេត្តកណ្ដាល។

ក្នុងឱកាសនោះ លោកមេបញ្ជាការរង បាននាំមកជាមួយនូវការផ្តាំផ្ញើសាកសួរសុខទុក្ខពីសំណាក់ ឯកឧត្ដមមេបញ្ជាការ ដែលតែងតែយកចិត្តទុកដាក់ មើលការខុសត្រូវខ្ពស់ ទាំងស្មារតី និងសម្ភារៈសម្រាប់ជួយសម្រាលដល់សុខទុក្ខសហការីទាំងអស់ទូទាំងកងឯកភាព ដែលមានធុរៈផ្សេងៗកន្លងមកដោយមិនបានរើសអើងពីឋានៈតួនាទី និងភារកិច្ចឡើយ។ លោកវរសេនីយ៍ឯក ឈៀ វណ្ណឌី មេបញ្ជាការរង បាននាំយកនូវអំណោយមួយចំនួនរបស់ ឯកឧត្តម មេបញ្ជាការ រួមមាន អង្ករ២២គីឡូក្រាម, ទឹកសុទ្ធ០១កេស, មី ០១កេស, ត្រីខ០១យួរ, ប្រេងឆា០១ដប, ម្សៅស៊ុប០១កញ្ចប់, ប៊ីចេង០១កញ្ចប់ រួមជាមួយនិងថវិកាចំនួន ៤០០.០០០រៀលផងដែរ។

លោកស្រីអនុសេនីយ៍ឯក វ៉ាន់ សម្ផស្ស នាយរងផ្នែកគិលានដ្ឋាន របស់ទីបញ្ជាការតំបន់ប្រតិបត្តិការសឹករងកណ្តាល បានគោរពថ្លែងអំណរគុណយ៉ាងជ្រាលជ្រៅចំពោះឯកឧត្តម មេបញ្ជាការ និងក្រុមការងារ ដែលតែងតែគិតគួរខ្ពស់ពីសុខទុក្ខ សហការី និងសូមគោរពជូនពរ ឯកឧត្តម និងក្រុមការងារ សូមប្រកបបានសុខភាពល្អបរិបូណ៌ ជួបប្រទះនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕