ភ្ញាក់ផ្អើល!! ស្រីម្នាក់ប្តឹងនគរបាល ប៉ុស្តិ៍អន្តោប្រវេសន៍ច្រកអន្តរជាតិអូរស្មាច់មួយរូប ពីបទជម្រិតទាប្រាក់៤០០បាត ជាថ្នូរ នៅឧត្តរមានជ័យ

នគរបាលប៉ុស្តិ៍អន្តោប្រវេសន៍ច្រកអន្តរជាតិអូរស្មាច់មួយរូប គឺលោកអនុសេនីយ៍ឯក សៀន វណ្ណា ត្រូវបានស្ត្រីម្នាក់រស់នៅសង្កាត់អូរស្មាច់ ដាក់ពាក្យប្តឹងទៅអគ្គនាយកដ្ឋានអន្តោប្រវេសន៍ ពីបទជម្រិតទាប្រាក់ចំនួន ៤០០បាត ជាថ្នូរនឹងការមិនចាប់សត្វមាន់២ក្បាល ដែលស្ត្រីដើមបណ្ដឹងទិញមកពីប្រទេសថៃ ដើម្បីយកមកចិញ្ចឹមជាលក្ខណៈគ្រួសារ។

ពេលមកដល់មាត់ច្រកទ្វារអន្តរជាតិអូរស្មាច់ នាវេលាម៉ោង៩ព្រឹកថ្ងៃដដែល ស្រាប់តែលោក អនុសេនីយ៍ឯក សៀន វណ្ណារ៉ា មិនអនុញ្ញាតឱ្យនាំសត្វមាន់២ក្បាលនោះចូលទៅទេ។

មន្ត្រីនគរបាលរូបនោះថែមទាំងទារប្រាក់ចំនួន៤០០បាត ជាថ្នូរនឹងការមិនដកហូតមាន់ ទាំងពីរក្បាលនេះទុក។ ដោយសារការអង្វរមិនព្រម អ្នកដែលគាត់ផ្ញើឱ្យទិញមាន់នោះ ក៏បង់ប្រាក់ឱ្យមន្ត្រីនគរបាលរូបនោះចំនួន ៤០០បាត តាមការទាមទារ។

ដោយសារទង្វើរបស់មន្ត្រីនគរបាលអន្តោរប្រវេសន៍ ច្រកអន្តរជាតិអូរស្មាច់បែបនេះ ស្ត្រីដដែលក៏បានសម្រេចដាក់ពាក្យប្តឹង ទៅអគ្គនាយកដ្ឋានអន្តោប្រវេសន៍នៅថ្ងៃនេះ ដោយមិនខ្លាចនោះទេ។ គាត់ថា នគរបាលអន្តោរប្រវេសន៍ច្រកអន្តរជាតិអូស្មាច់ តែងតែធ្វើបាបប្រជាពលរដ្ឋទន់ខ្សោយជាញឹកញាប់ ពេលខ្លះមានការឈ្លោះប្រកែកជេរគ្នា រឿងយកលុយពីពលរដ្ឋទៅទិញម្ហូបពីថៃ ដឹកតាមម៉ូតូក៏មានដែរ៕