ខ្មាន់កាំភ្លើង និងជនរងគ្រោះជាសន្ដិសុខយាម ជាមួយគ្នា ស្គាល់អត្តសញ្ញាណខ្មាន់កាំភ្លើង បាញ់ប្រហារលើសន្ដិសុខនៅធនាគារ CIMB

ភ្នំពេញ ៖ នៅរសៀលថ្ងៃទី០៧ ខែកញ្ញា ឆ្នាំ២០២២នេះ អត្តសញ្ញាណរបស់ខ្មាន់កាំភ្លើង ដែលបាញ់ប្រហារលើសន្ដិសុខនៅធនាគារ CIMB សាខាផ្លូវលេខ៥១៦ ក្រុមទី៥២ ភូមិ១៣ សង្កាត់បឹងកក់ទី១ ខណ្ឌទួលគោក ត្រូវបានសមត្ថកិច្ចបង្ហើបឲ្យដឹងហើយ គឺជាសន្ដិសុខយាមនៅកន្លែងកើតហេតុជាមួយគ្នា។

ឈ្មោះ លន់ ជីវ័ន អាយុ២៥ឆ្នាំ ជនជាតិខ្មែរ មុខរបរយោធា និងជាសន្តិសុខក្រុមហ៊ុន safeguards Cambodia co.ltd យាមគោលដៅធនាគារ CIMB (រត់គេចខ្លួន)។ ដោយឡែក ឈ្មោះ ឃុន វន អាយុ៤៧ឆ្នាំ ជនជាតិខ្មែរ មុខរបរសន្តិសុខក្រុម IG security។
យោងតាមការសាកសួរជំហ៊ានដំបូង បានបញ្ជាក់ថា ដើមចមនៃអំពើបាញ់ប្រហារនេះ គឺដោយសារទំនាស់ពាក្យសំដីគ្នារវាងជនរងគ្រោះ និងជនសង្ស័យ។ ក្រោយកើតហេតុ ខ្មាន់កាំភ្លើងជិះម៉ូតូរត់គេចខ្លួនបាត់ ខណៈជនរងគ្រោះរបួសត្រង់ភ្លៅខាងស្ដាំ ត្រូវបានបញ្ជូនទៅសង្គ្រោះនៅមន្ទីរពហុព្យាបាលអង់តែនទួលគោក។ កម្លាំងជំនាញកំពុងរួមដៃគ្នា ស្រាវជ្រាវយ៉ាងយកចិត្តទុកដាក់ ដើម្បីស្វែងរកខ្មាន់កាំភ្លើងយកមកផ្ដន្ទាទោសតាមផ្លូវច្បាប់៕