ឯកឧត្ដម ឃួង ស្រេង អភិបាលរាជធានីភ្នំពេញចុះត្រួតពិនិត្យស្ថានភាពទឹកស្ទឹងព្រែកត្នោត និងត្រៀមជម្លៀសប្រជាពលរដ្ឋចេញពីស្ថាភាពដែលមានគ្រោះថ្នាក់ទៅកាន់ទីទួលមានសុវត្ថិភាព
ភ្នំពេញ ៖ ឯកឧត្ដម ឃួង ស្រេង អភិបាលរាជធានីភ្នំពេញ នៅព្រឹកថ្ងៃទី២៧ ខែតុលា ឆ្នាំ២០២១នេះ បានដឹកនាំក្រុមមន្ត្រីជំនាញ អាជ្ញាធរមូលដ្ឋាន និងកងកម្លាំងទាំង ៣ប្រភេទ បន្តចុះត្រួតពិនិត្យស្ថានភាពទឹកស្ទឹងព្រែកត្នោត និងទីតាំងដែលទឹកហូរច្រោះ ព្រមទាំងត្រៀមជួយសង្គ្រោះប្រជាពលរដ្ឋមួយចំនួនទៅកាន់ទីទួលមានសុត្ថិភាព។
ករណីនេះអាជ្ញាធរមូលដ្ឋាន បានឲ្យដឹងថា ទ្វារទប់ទឹកមួយកន្លែងមានទីតាំងនៅចន្លោះរវាងក្នុងភូមិសាលា និងភូមិកន្តុយទឹក សង្កាត់ទៀន ខណ្ឌដង្កោ ត្រូវបានទឹកហូរច្រោះតាំងពីម៉ោងប្រមាណ ១២,៣០នាទី យប់រំលងអាធ្រាត្រថ្ងៃទី២៧ ខែតុលា ឆ្នាំ២០២១នេះ។
ស្ថានភាពទឹកហូរច្រោះខាងលើនេះ អាចជះផលប៉ះពាល់ដល់ភូមិសាស្ត្រសង្កាត់មួយចំនួនដូចជា, សង្កាត់គង់នយ សង្កាត់ទៀន សង្កាត់ស្ពានថ្ម សង្កាត់ព្រែកកំពឹស និងសង្កាត់រលួស ក្នុងខណ្ឌដង្កោ ដោយត្រូវជម្លៀសប្រជាជនចេញពីលំនៅដ្ឋានដើម្បីរកទីទួលសុវត្ថិភាព។
សម្រាប់ស្ថានភាពនេះ ឯកឧត្ដម ឃួង ស្រេង អភិបាលរាជធានីភ្នំពេញបានដឹកនាំ និងបញ្ជាឲ្យកងកម្លាំងជម្លៀសប្រជាជនមកកាន់ទីទួលសុវត្ថិភាពជាបន្តបន្ទាប់ ហើយមិនទាន់មានប្រជាពលរដ្ឋណាម្នាក់មួយ រងគ្រោះថ្នាក់ដល់ជីវិតនៅក្នុងស្ថានភាពនេះទេ។
ឯកឧត្ដម ឃួង ស្រេង ក៏បានណែនាំឲ្យកងកម្លាំង និងមន្ត្រីជំនាញសហការគ្នាយកបាវខ្សាច់ ចាក់ទប់បិទមុខទឹក ដើម្បីកុំឲ្យហូរទៅផ្នែកខាងក្រោម នៃសង្កាត់គង់នយ សង្កាត់ទៀន សង្កាត់ស្ពានថ្ម សង្កាត់ព្រែកកំពឹស និងសង្កាត់រលួស។
ពាក់ព័ន្ធការធ្លាយទំនប់សណ្តរស្ទឹងព្រែកត្នោត កាលពីយប់មិញនេះ អាជ្ញាធររាជធានីភ្នំពេញ គ្រប់គ្រងបានប្រមាណ៨០ភាគរយហើយ គិតដល់ម៉ោងជិត១២ត្រង់ត្រង់នេះ។
គួរបញ្ជាក់ថា ក្រោមការបញ្ជាដោយផ្ទាល់ពី ឯកឧត្ដម ឃួង ស្រេង អភិបាលរាជធានីភ្នំពេញ ការធ្លាយទំនប់សណ្តរស្ទឹងព្រែកត្នោត កាលពីយប់ម៉ិញថ្ងៃទី ២៦ តុលានេះ អាជ្ញាធររាជធានីភ្នំពេញ គ្រប់គ្រងបានប្រមាណ ៨០ភាគរយ ហើយ គិតមកដល់ម៉ោងនេះ។
ចំណែក នៅព្រឹកថ្ងៃទី២៧ ខែតុលា ឆ្នាំ២០២១នេះ ក្រោយពីទទួលបានព័ត៌មានជុំវិញ ការធ្លាយទំនប់សណ្តរស្ទឹងព្រែកត្នោតកាលពីយប់មិញ ឯកឧត្ដម ឃួង ស្រេងបានចុះមកដល់ទីកន្លែងកើតហេតុភ្លាមៗ និងបានបញ្ជា ដោយប្រើប្រាស់គ្រប់មធ្យោបាយ ដើម្បីទប់ទឹកដែលធ្លាយកាលពីយប់មិញនេះ កុំអោយបង្កគ្រោះមហន្តរាយដល់បងប្អូនប្រជាពលរដ្ឋ។
ទំនប់សណ្តរស្ទឹងព្រែកត្នោតដែលបានធ្លាយ កាលពីយប់ម៉ិញ ថ្ងៃទី២៦តុលានេះ មានទីតាំងស្ថិតក្នុងភូមិកន្ទុយទឹក សង្កាត់ទៀន ខណ្ឌដង្កោ រាជធានីភ្នំពេញ។ ទីតាំងនេះ ត្រូវបានប្រជាពលរដ្ឋ ក៏ដូចជាអាជ្ញាធរមូលដ្ឋាន បញ្ជាក់ថា ពីមុនជាទ្វាទឹក (ប្រឡាយ៨៥) ក្រោយមកត្រូវបានបិទមិនអោយដំណើរការ លុះមកដល់មានជំនន់ទឹកសណ្តរស្ទឹងព្រែកត្នោតនេះ អតីតទ្វាទឹកនេះ បានជ្រៀបទឹករហូតធ្លាយពីខាងក្រោមតែម្តង។
ក្រោយពីធ្លាយទំនប់នេះ មិនបានប៉ុន្មានម៉ោងផង អាជ្ញាធររាជធានីភ្នំពេញ ក្រោមការបញ្ជាពីផ្ទាល់ពី ឯកឧត្ដម ឃួង ស្រេង អភិបាលរាជធានីភ្នំពេញ យើងអាចគ្រប់គ្រប់គ្រងបានប្រមាណ៨០ភាគរយ ដែលវានឹងមិនបង្កគ្រោះថ្នាក់ធ្ងន់ធ្ងរដល់ប្រជាពលរដ្ឋបន្ថែមទៀត។
បញ្ហានេះមន្ត្រីរដ្ឋបាលខណ្ឌដង្កោបានអោយដឹងថា ការបាក់ទំនប់ទឹកសណ្តរស្ទឹងព្រែកត្នោតនេះ វាបានប៉ះពាល់ដល់ភូមិចំនួន៤ ក្នុងសង្កាត់ទៀតនៃខណ្ឌដង្កោ ក្នុងនោះមាន ភូមិកន្ទុយទឹក ប៉ះពាល់ចំនួន ៥៣ខ្នងផ្ទះ ភូមិថ្មចំនួន៩៣ខ្នង ភូមីក្រាំង៨៥ខ្នង ភូមិសាលាចំនួន៧៤ សរុប៣០៦ខ្នងផ្ទះ។
ប៉ុន្តែទោះបីជាយ៉ាងណាក្តី គ្រោះមហន្តរាយនេះវាមិនបានអូសបន្លាយអោយធ្ងន់ធ្ងរជាងនេះថែមទៀតនោះទេ បើ អាចទប់ស្កាត់បានទាន់ពេលវេលា៕
